ფანარიონი პრივილეგიებზე: შეგვეძლო ეკლესიაში ერთხელისუფლებიანობის დამყარება
კონსტანტინოპოლის პატრიარქი იუწყება, რომ ფანარი უარს არ ამბობს მასზე გადაცემულ ეკლესიოლოგიაზე და დაწესებულ და კრებების მიერ კურთხელ „პენტარქიის“ სისტემაზე.
2021 წლის 21 აგვისტოს პატრიარქმა ბართლომემ განაცხადა, რომ კონსტანტინოპოლის საპატრიარქოს შეეძლო ერთხელისუფლებიანობის დამყარება მართლმადიდებლობაში, მაგრამ ეს არ გააკეთა, იუწყება უკრაინის მართლმადიდებელი ეკლესიის ოფიციალური საიტი.
ზლატოვერხის წმინდა მიქაელის მონასტერში „დოქსოლოგიის“ დროს კონსტანტინოპოლის პატრიარქი ბართლომე ყვებოდა, რომ ფანარი „თავიდანვე იყო ეკლესიური მადლმოსილების საიმედო მცველი და მისი აღმავლობისა და ძალაუფლების რიცხობრივი გაზრდის პერიოდში შეეძლო აღმოსავლეთის მართლმადიდებელი ეკლესიის მოწყობის პირამიდული ფორმის დამკვიდრება, მაგრამ ზიზღით უარყო ეს აზრი და უარი არ თქვა არც მასზე გადაცემულ ეკლესიოლოგიაზე და არც დაწესებულ და კრებების მიერ კურთხელ „პენტარქიის“ სისტემაზე“.
მან აგრეთვე თქვა, რომ ფანარიონი „არასდროს არ იხსენებს დიდი ტკივილის დღეებს, სილის გაწნას, წყენას და ღალატს, პირიქით, ყოველთვის მიდის პატიების, ქველმოქმედებისა და უკლებლივ ყველა შვილის განკურნების გზით“.
„ეს დიდი ეკლესიების პრივილეგიებია, რომლებსაც საყვედურობენ ისინი, ვინც კათედრის პირველობაზე, ამქვეყნიურ პრეტენზიებზე და პოლიტიკურ მისწრაფებებზე ლაპარაკობს“, - თქვა ფანარის მეთაურმა.
მისი სიტყვებით, „ერთადერთი პრივილეგია, რომელიც კონსტანტინოპოლის ეკლესიას აქვს, ღმერთში სიამაყეა“. ეს, თვლის პატრიარქი ბართლომე, „მსხვერპლის პრივილეგიაა, საიდანაც მომდინარეობს დაუძლურების პირველობა და სამსხვერპლო მსახურების მოვალეობა“.
მან აღნიშნა, რომ დღეს „ქრისტეს გლახაკთა ეკლესია“, „მსხვერპლის სისხლიან პორფირში“ შემოსილი ზრუნავს „უკრაინაში მართლმადიდებლობის ერთობაზე და მთელი უკრაინელი ხალხის პროგრესზე და კეთილდღეობაზე“.
მანამდე მართლმადიდებელ ჟურნალისტთა კავშირი წერდა, რომ ფანარიონის მეთაურის სიტყვებით, „ყველა „ახალი“ ეკლესია ჩვენი სხეულიდან არის შექმნილი“.
