უმე-ს წინამძღოლი: ქრისტიანებმა სიკეთე უნდა აკეთონ, მის ნაცვლად კი არაფერს არ უნდა ელოდონ
მღვდელმთავარმა ხაზი გაუსვა, რომ შურისძიებით ჩვენ ბოროტებას ვამრავლებთ, ხოლო მიტევებით - ვანადგურებთ მას.
საკვირაო ქადაგების დროს უნეტარესმა მიტროპოლიტმა ონოფრემ ხაზი გაუსვა თავგანწირული სიყვარულისა და მიტევების მნიშვნელობას, რაც მშვიდობის პერსპექტივის საწინდარია. მან აღნიშნა, რომ სწორედ ამიტომ ღვთისგან ბოძებული გვაქვს მცნება მტრის სიყვარულისა, იუწყება სინოდალური საინფორმაციო-საგანმანათლებლო განყოფილება.
მან ისაუბრა იმის აუცილებლობაზე, რომ ქრისტიანებმა სხვა ადამიანებისთვის სიკეთე უნდა აკეთონ, მის ნაცვლად კი არაფერს არ უნდა ელოდონ.
მღვდელმთავრის სიტყვებით, მორწმუნე ადამიანთა ამგვარი საქციელის აღწერა შესაძლებელია სიტყვით „მსხვერპლი“.
უნეტარესმა მიტროპოლიტმა ონოფრემ აგრეთვე გაიხსენა ძილად მისვლის ლოცვის სიტყვები: „სახიერო უფალო, შეუნდევ მოძულეთა და მაჭირვებელთა ჩვენთა“. მან განმარტა, რომ ეს ლოცვა განსაკუთრებით მნიშვნელოვანია, რადგან მიმართულია მათკენ, ვინც ჩვენს მიმართ ბოროტებას სჩადის. „ეს ლოცვა არის მათთვის, ვინც ჩვენს მიმართ ბოროტებას სჩადის. ეს ლოცვა ანადგურებს ბოროტებას. შურისძიებით ჩვენ ბოროტებას ვამრავლებთ, ხოლო მიტევებით - ვანადგურებთ მას. ეს არის სულიერი კანონი. და სანამ ეს კანონი ჩვენ შორის იქნება, მანამდე იქნება სიცოცხლე ჩვენ შორის. თუ ადამიანები უფრო გაბოროტდებიან და შურისმაძიებლები იქნებიან, თუ ისინი ერთმანეთს დასჯიან, ეს მიგვიყვანს მთელი კაცობრიობის საერთო დაღუპვისკენ“, - თქვა მისმა უნეტარესობამ.
დასასრულს მღვდელმთავარმა უსურვა მორწმუნეებს, რომ ყოველთვის მოექცნენ მოყვასებს ისე, როგორც სურთ, რომ თავად მათ მოექცნენ და ამას „ოქროს კანონი“ უწოდა. „ეს ისეთი ოქროს კანონია, რომელიც ნებისმიერ სიტუაციაში, ნებისმიერ ცხოვრებისეულ შემთხვევაში , სირთულეებში გვეხმარება სწორი გადაწყვეტილების მიღებაში“.
„თუ ვინმესთან რამე უსიამოვნება მაქვს და არ ვიცი, როგორ მოვექცე მას, მის ადგილზე ჩემი თავი უნდა წარმოვიდგინო, ის კი - ჩემს ადგილზე. როგორც მსურს, რომ ის მომექცეს მე, ასევე მეც უნდა მოვექცე მას. ეს არის ის ოქროს კანონი, რომელიც გვასწავლის სწორ თანაცხოვრებას“, - ხაზი გაუსვა მიტროპოლიტმა ონოფრემ.
