მოსკოვის ს.სსკგ: „პოლიტკორექტული ლოცვა“აშშ-ს კონგრესში ღვთისგმობის ზღვარზეა
მიტროპოლიტმა ილარიონ (ალფეევმა) ხაზი გაუსვა, რომ პოლიტკორექტულობის წესებით არ შეიძლება შევიჭრათ იმაში, რაც მილიონობით ადამიანისთვის სიწმინდეს წარმოადგენს.
მოსკოვის საპატრიარქოს საგარეო საეკლესიო განყოფილების უფროსი, ვოლოკოლამსკის მიტროპოლიტი ილარიონი თვლის, რომ „პოლიტკორექტული ლოცვა“, რომელმაც აშშ-ს კონგრესში გაიჟღერა, ღვთისგმობის ზღვარზეა. ამის შესახებ მან განაცხადა ტელეარხ «Россия 24» ეთერში შაბათს, 2021 წლის 23 იანვარს.
117-ე მოწვევის კონგრესის მუშაობის პირველ დღეს ამერიკელმა კონგრესმენმა ემანუელ კლივერმა, გაერთიანებული მეთოდისტური ეკლესიის პასტორმა, წაიკითხა შესავალი ლოცვა, რომელსაც პოლიტკორექტული უწოდა. „სახელითა ღვთისას“ მაგივრად მან თქვა „სახელითა მონოთეისტური ღმერთისა, ბრაჰმისა და ღმერთისა, მრავალი სახელით ცნობილისა“. ბოლოს კი კლივერმა წარმოთქვა «amen and a woman» („ამინ და ქალი“) - ეტყობა, სიტყვაში «amen» ინგლ. მან გაიგო «а men» – „კაცი“.
მიტროპოლიტ ილარიონის აზრით, ასეთი „პოლიტკორექტული ლოცვა“ ღვთისგმობის ზღვარზეა.
„ყველაფერი უნდა იყოს თავის გონივრულ საზღვრებში, პოლიტკორექტულობის წესებითაც კი არ შეიძლება შევიჭრათ იმაში, რაც მილიონობით ადამიანისთვის სიწმინდეს წარმოადგენს“, - განაცხადა მოსკოვის საპატრიარქოს საგარეო საეკლესიო განყოფილების უფროსმა.
მან ხაზი გაუსვა, რომ „ჩვენ, ქრისტიანებს, გვწამს მამა, ძე და სული წმინდა“.
„მართლაც, მამა, ძე და სული წმინდა გენდერულად არანეიტრალური სახელებია და ფემინისტური მოძრაობის წარმომადგენლებისთვის ეს სახელები მიუღებელია. ამიტომ მათ შეცვალეს სწავლება წმინდა სამებაზე, სწავლება ღმერთზე, ღმერთს რაღაც სხვა სახელებს და ნაცვალსახელებს უწოდებენ, მათ შორის მდედრობით სქესშიც. ახლა ზოგიერთი პოლიტიკოსი თავს ვალდებულად თვლის დაიცვას პოლიტკორექტულობის, ჩემი აზრით, ეს უაზრო წესები. ეკლესიის თვალსაზრისით, ეს ყველაფერი დაუშვებელი ჩარევაა იმაში, რაც მილიონობით მორწმუნესთვის სიწმინდეს წარმოადგენს“, - განმარტა ვოლოკოლამსკის მიტროპოლიტმა ილარიონმა.
მანამდე მართლმადიდებელ ჟურნალისტთა კავშირი წერდა, რომ აშშ-ს დემოკრატები ოფიციალურ დოკუმენტებში არ ანსხვავებენ მამრობით და მდედრობით სქესს, მათ უარი თქვეს სიტყვებზე “he” და “she”.
