რმე-ში მღვდელმა საჯაროდ მოინანია, რომ მშვიდობისთვის ლოცულობდა

სოფელ პაგარელოეს ელიას ეკლესიის წინამძღვარმა, რუსეთის მართლმადიდებლური ეკლესიის მღვდელმა ილია გავრიშკოვმა, მმართველი ეპისკოპოსის ადრიანის მუქარის და მსახურების უფლების ჩამორთმევის შემდეგ, მრევლის წინაშე მოინანია, რომ „სიამაყისა და უგუნურების გამო“ ილოცა მშვიდობისთვის, „და არა ისე, როგორც საჭიროა“. ეპისკოპოსისა და მღვდლის გამოსვლების ვიდეოჩანაწერი ფეისბუქზე ფანარის სასულიერო პირმა მამა გიორგი როიმ გამოაქვეყნა.

ვიდეოკადრებში ეპისკოპოსმა მრევლს ჯერ ეპარქიის ადმინისტრაციაში საუბრის შესახებ უამბო მათი მოძღვარის საქციელთან დაკავშირებით.

"რა უნდა ვქნათ? აქ უნდა დავუძახოთ ბიჭს. ვიწვევთ. ჩვენ ვამბობთ, არის ასეთი სიტუაცია, შემდეგ ვსაუბრობთ როგორ უნდა მოვიქცეთ’’, - ამბობს ვიდეო ჩანაწერში ეპისკოპოსი. – ჯერ მსახურებას ავუკრძალავთ და თუ ის არ მოინანიებს, მაშინ მხოლოდ და მხოლოდ მღვდლის წოდებას ჩამოვართმევთ. ანუ, ანაფორას გაიხდის და ისეირნებს თავის ნებაზე. ვინ იყავი? მამა ელია? და ახლა ვინ ხარ? ვიღაც ილიუშკა. კარგი, წადი და იარე თავისუფლად.’’

ეპისკოპოსმა თქვა, რომ ”როდესაც ეს ბიჭს ავუხსენით, ის მაშინვე გონს მოეგო, იმწამსვე წავიდა და წერილი დაწერა”. მან მრევლს უთხრა, რომ მამა ელიამ „მოინანა ჩვენთან, მაგრამ თქვენ არაფერი იცით ამის შესახებ, ამიტომ მოინანიოს თქვენს წინაშე“.

ეპისკოპოსის მიერ ამბიონზე გამოძახებულმა მღვდელმა თავის სამწყსოს მიმართა, რომ „სიბრიყვის, გაუგებრობის, სიამაყისა და სისულელის გამო ვკითხულობდი ლოცვებს მშვიდობისთვის და არ წამიკითხავს ის, რაც უნდა წამეკითხა“.

მან ასევე მოინანია ეპისკოპოსისა და სამწყსოს წინაშე, რომ „აფექტის მდგომარეობაში“ მოაწერა ხელი რუსეთის მართლმადიდებელი ეკლესიის 300 მღვდელმთავრის მიმართვას უკრაინის ომის წინააღმდეგ.

მანამდე მჟკ წერდა, რომ რუსეთის მართლმადიდებლურმა ეკლესიამ განმარტა თუ რატომ არ აპროტესტებენ ომს უკრაინის წინააღმდეგ.