ქვეყანაში მომხდარ არეულობას ქართული ეკლესია გამოეხმაურა

საქართველოს მართლმადიდებელი ეკლესიის საპატრიარქო საქართველოში მიმდინარე საპროტესტო აქციებსა და არეულობებთან დაკავშირებით განცხადებას ავრცელებს. საქართველოს მართლმადიდებელი ეკლესიის განცხადებით, ისინი მხურვალედ ლოცულობენ ქვეყანაში მშვიდობისა და ერთსულოვნებისთვის. ამის შესახებ Tabula.ge იუწყება.

მიმართვაში ნათქვამია, რომ „სამეზობლოში შექმნილი რთული ვითარებიდან გამომდინარე, მშვიდობიანი კურსის შენარჩუნება და ქვეყნის დამოუკიდებლობა პროგრესის ერთადერთი შესაძლებლობაა“.

„ჩვენი ქვეყანა გადის ურთულეს გზას, რომ გახდეს ძლიერი სახელმწიფო, რისთვისაც ძალიან ფრთხილად უნდა ვიყოთ როგორც სახელმწიფო ინსტიტუტების, ისე საზოგადოების მხრიდან. ეკლესია, როგორც ჩვენი ხალხისა და ქვეყნის უდიდესი გამაერთიანებელი და კეთილისმყოფელი, მხურვალედ ლოცულობს მშვიდობისა და ერთსულოვნებისთვის. მიგვაჩნია, რომ სამეზობლოში შექმნილი მძიმე ვითარებიდან გამომდინარე, ქვეყნის მშვიდობიანი კურსის შენარჩუნება და დამოუკიდებლობა ქვეყნის წინსვლის ერთადერთი ამოსავალი წერტილია. რადიკალურ განცხადებებს, რომლებიც პოლარიზაციას უწყობს ხელს, მივიჩნევთ მშვიდობის დარღვევის მცდელობად, რა მხრიდანაც არ უნდა გავრცელდეს ისინი, განსაკუთრებით სასულიერო პირების მხრიდან“, - აცხადებენ საპატრიარქოში.

საპატრიარქო საპროტესტო ტალღასთან დაკავშირებით სასულიერო პირების განცხადებებზეც წერს და აღნიშნავს, რომ „ასეთი დამოკიდებულება ეკლესიის ოფიციალური ხედვისთვის უცხოა“.

„სოციალურ ქსელში ვრცელდება ცალკეული სასულიერო პირების ქადაგებები და გამოსვლები, რომლებიც ეხება პოლიტიკურ თემებს, იქნება ეს გადაჭარბებული „სიმპათია“ ჩრდილოელი მეზობლის მიმართ თუ უშუალოდ სახელმწიფოს რადიკალური კრიტიკა. ჩვენ ცალსახად ვაცხადებთ, რომ ასეთი დამოკიდებულებები უცხოა ეკლესიის ოფიციალური ხედვისა და ზოგადად ქრისტიანული სულისთვის, რაც არაერთხელ დაფიქსირებულა და გაჟღერებულა საპატრიარქოს ოფიციალურ პოზიციებში და საქართველოს კათოლიკოს-პატრიარქის პირად განცხადებებში ევროინტეგრაციის გზასთან დაკავშირებით.“

შეგახსენებთ, რომ 7 მარტს, მას შემდეგ რაც საქართველოს პარლამენტმა უცხოური აგენტების შესახებ კანონი პირველი მოსმენით მიიღო, თბილისში მასობრივი საპროტესტო აქციები და არეულობები დაიწყო და მეორე დღეს, 8 მარტს გაგრძელდა. საქართველოს პრეზიდენტმა პირობა დადო, რომ კანონს ვეტოს დაადებდა, 9 მარტს მმართველმა პარტიამ „ქართული ოცნება“ კანონის გაწვევის პირობა დადო.

როგორც მჟკ იტყობინება, 2022 წლის 24 თებერვალს სრულიად საქართველოს კათოლიკოს-პატრიარქმა ილია მეორემ უკრაინაში საომარი მოქმედებების შეწყვეტისკენ მოუწოდა.