რადამ მხარი დაუჭირა პატრიარქისა და რმე-ს იერარქების წინააღმდეგ სანქციებს

2022 წლის 31 მაისს უკრაინის უმაღლესმა რადამ მიმართა უკრაინის ეროვნული უშიშროებისა და თავდაცვის საბჭოს წინადადებით რუსეთის მართლმადიდებლური ეკლესიის რვა წარმომადგენლის, მათ შორის პატრიარქ კირილის წინააღმდეგ 10 წლით სანქციების დაწესების შესახებ. რადას სხდომაზე 292-მა სახალხო დეპუტატმა მხარი დაუჭირა შესაბამისი რეზოლუციის პროექტს, განაცხადა სახალხო დეპუტატმა იაროსლავ ჟელეზნიაკმა ტელეგრამის არხზე.

სანქციების სიაში პირველები არიან:

• მოსკოვისა და სრულიად რუსეთის პატრიარქი კირილი
• მიტროპოლიტი ილარიონი - რუსეთის მართლმადიდებელი ეკლესიის ეპისკოპოსი, ვოლოკოლამის მიტროპოლიტი, მოსკოვისა და სრულიად რუსეთის პატრიარქის ვიკარი, მოსკოვის საპატრიარქოს საგარეო საეკლესიო ურთიერთობის განყოფილების თავმჯდომარე, წმიდა სინოდის მუდმივი წევრი.
• დეკანოზი ნიკოლაი ბალაშოვი - რუსეთის მართლმადიდებლური ეკლესიის სასულიერო პირი, პატივცემული დეკანოზი, მოსკოვის საპატრიარქოს საგარეო საეკლესიო ურთიერთობის განყოფილების თავმჯდომარის მოადგილე, აღდგომის ტაძრის წინამძღოლი მოსკოვში, ვრაჟეკის მიძინების ტაძრის წინამძღოლი. რუსეთის მართლმადიდებელი ეკლესიის საბჭოს წევრი, ღვთისმეტყველების დოქტორი.
• ფსკოვისა და პორხოვის მიტროპოლიტი ტიხონი - ფსკოვის მიტროპოლიის წინამძღვარი (2018 წლის მაისიდან); ფსკოვ-გამოქვაბულების მონასტრის არქიმანდრიტი და წინამძღვარი, საპატრიარქოს კულტურის  საბჭოს თავმჯდომარე.

გარდა ამისა, სანქციები შეიძლება შეეხონ სიქტივკარისა და კომი-ზირიანსკის მთავარეპისკოპოს პიტირიმს, დეკანოზ არტემი ვლადიმეროვს, დეკანოზ ანდრეი ტკაჩევს და მოსკოვის სასულიერო აკადემიის პროფესორს ალექსეი ოსიპოვს.

პერსონალური შეზღუდვები მოიცავს იერარქების სავარაუდო საკუთრებაში არსებული აქტივების ბლოკირებას, სავაჭრო ოპერაციების შეზღუდვას, რესურსების ტრანზიტს, ასევე ამ პირთა გადაადგილებას უკრაინის ტერიტორიაზე და მის გავლით.

სახელმწიფო ასევე მოითხოვს შეწყდეს ეკონომიკური და ფინანსური ვალდებულებების შესრულება რუსეთის მართლმადიდებლური ეკლესიის იერარქებთან მიმართებაში, აკრძალოს მონაწილეობა ქვეყნის ტერიტორიაზე ობიექტების პრივატიზაციასა და იჯარაში, ფასიანი ქაღალდებით გარიგებებში. კანონპროექტის დამტკიცების შემთხვევაში მათ ეკრძალებათ უკრაინის რადიოსიხშირეებითა და ელექტრონული კომუნიკაციებით, სავაჭრო ხელშეკრულებებითა და ერთობლივი პროექტებით სარგებლობა.

ცალკე პუნქტი ითვალისწინებს კულტურული გაცვლის, სამეცნიერო თანამშრომლობის, საგანმანათლებლო და სპორტული კონტაქტების ფარგლებში ღონისძიებების აკრძალვას. ვიზიტები, მოლაპარაკებები და შეთანხმებები გაუქმებულია და ასევე უნდა ჩამოერთვას უკრაინის სახელმწიფო ჯილდოები მათ ვისაც აქვს.

როგორც მჟკ წერდა, დუმენკომ პატრიარქ კირილის გასამართლება მოითხოვა.