ურ-ში განაცხადეს არავაქცინირებულთათვის შეზღუდვების შემოღების თაობაზე

უმაღლესი რადას ერის ჯანმრთელობის, სამედიცინო დახმარებისა და სამედიცინო დაზღვევის საკითხების კომიტეტის მეთაური მიხეილ რადუცკი. ფოტო : polygraf.net

უკრაინა იძულებული იქნება შემოიღოს შეზღუდვები მოქალაქეებისთვის, რომლებიც არ არიან კორონავირუსზე ვაქცინირებულები. ამის შესახებ დაწერა უმაღლესი რადას ერის ჯანმრთელობის, სამედიცინო დახმარებისა და სამედიცინო დაზღვევის საკითხების კომიტეტის მეთაურმა მიხეილ რადუცკიმ თავის ფეისბუქ-გვერდზე ორშაბათს, 2 აგვისტოს.

პირველ რიგში, საქმე ეხება მათ, ვინც თავისი საქმიანობის მიხედვით კონტაქტობს უამრავ ადამიანთან.

„უკრაინა დროთა განმავლობაში ასევე იძულებული იქნება შეზღუდვები შემოიღოს არავაქცინირებული მოქალაქეებისთვის - დაწერა საპარლამენტო კომიტეტის მეთაურმა. - ჯანმრთელობის სამინისტრომ უკვე დააანონსა, რომ ეპიდემიოლოგიური სიტუაციის გაუარესების შემთხვევაში იმუშავებენ სკოლები, სადაც ვაქცინირებული მასწავლებლების რაოდენობა 80%-ზე ნაკლები არ იქნება (ამჟამად ვაქცინირებულია საერთო რაოდენობის პედაგოგების მხოლოდ ნახევარი). ჩემი აზრით, ანალოგიური შეზღუდვები ლოგიკურია შემოღებულ იქნეს ტრანსპორტის სფეროში დასაქმებულთათვის, საზოგადოებრივი კვების საწარმოებისთვის და კომერციული ან კომუნალური სტრუქტურებისთვის, რომელთა თანამშრომლებიც უშუალოდ კონტაქტობენ მოსახლეობასთან“.

მისი სიტყვებით, იძულებით ვაქცინაციაზე საუბარი არ შეიძლება იყოს, „მაგრამ სრულიად მართებულია მოვითხოვოთ, რომ სამუშაოს, რომელიც ითვალისწინებს კონტაქტს უამრავ ადამიანთან, ასრულებდნენ ვაქცინირებული თანამშრომლები“.

„ამჟამად ყველა თავად წყვეტს - დასვენება და სრულფასოვანი სამუშაო თუ იძულებითი შეზღუდვები კორონავირუსის მორიგი ტალღის დროს“, - დაამატა მიხეილ რადუცკიმ.

ადრე რადუცკი აცხადებდა, რომ კორონავირუსის სავალდებულო ვაქცინაცია „უკრაინის კანონმდებლობის მიხედვით, სამწუხაროდ, შეუძლებელია“.

როგორც მჟკ გვატყობინებდა, უკრაინის ჯანდაცვის სამინისტროში დაუშვეს QR- კოდის სახით ვაქცინაციის შესახებ ციფრული სერტიფიკატის შემოღება.