სუმის ქალაქ დრუჟბაში რუსული დაბომბვის შედეგად განადგურდა უმე-ის ტაძარი

წმინდა სერაფიმე საროველის ტაძარი (ქ. დრუჟბა). ფოტო: пресс-службы Конотопской епархии

2024 წლის 21-22 მარტის ღამეს, სუმის რაიონის ქალაქ დრუჟბას რუსული ჯარების დაბომბვის შედეგად, სერიოზულად დაზიანდა წმინდა სერაფიმე საროველის სახელობის ეკლესია, - ამის შესახებ კონოტოპის ეპარქიის პრესსამსახურმა იუწყა.

აფეთქების შედეგად დაინგრა ეკლესიის კედლები და სახურავი, ყველა სარკმელი ჩამსხვრეულია, დაზიანდა კანკელი და ინტერიერი. საბედნიეროდ მრევლიდან არავინ დაშავებულა.

ტაძრის წინამძღვარმა, მამა ალექსანდრემ ადგილობრივ გამოცემას განუცხადა, რომ აფეთქებამ თითქმის ყველაფერი გაანადგურა, რაც ტაძარში იყო.

„დაზიანდა სახურავი, გაჩნდა ბზარები ტაძარში, გატეხილია წმინდა ხატები, ჩაიმსხვრა ფანჯრები და კარები“, - განაცხადა მან.

მერის მოადგილე ოლეგ პაშკოვსკიმ თქვა, რომ „დარტყმა ღამით თორმეტ საათზე მოხდა, დაზიანდა ხუთსართულიანი შენობა, კერძო სახლები, ბაზარი, ტაძარი, სახანძრო სადგური და საკრებულოს ადმინისტრაციული შენობა“.

როგორც მჟკ წერდა, 22 მარტს, რუსული ჯარების მიერ დნეპრის დაბომბვის შემდეგ, დაზიანდა დასავლეთის საცხოვრებელ ზონაში მდებარე მართალი სვიმეონის სახელობის ეკლესია.