გაუთვალისწინებელი ევთანაზია: ბელგიაში ექიმებმა ქალი ბალიშით გაგუდეს

ბელგიაში მედიკოსებმა პაციენტი მოკლეს. ფოტო: RTL info

ბელგიაში ექიმებმა ევთანაზიის დროს ლეტალური ინექციის საჭირო დოზა ვერ გამოთვალეს და პაციენტი ბალიშით გაგუდეს, იუწყება ფრანგული რესურსი RTL info.

შემთხვევა ქალაქ უპეიში მოხდა, სადაც 36 წლის ალევსინამ მას შემდეგ რაც გაიგო, რომ კიბოს ბოლო სტადია ჰქონდა, ევთანაზიის გზით სიკვდილი გადაწყვიტა.

თუმცა, თავად ევთანაზია წარუმატებელი გამოდგა - წამლის დოზა არ იყო საკმარისი და ექიმებმა (ექიმმა და ორმა ექთანმა) გადაწყვიტეს პაციენტის დახრჩობა ბალიშით.

ალევსინას ქმარი და ქალიშვილი, მისი ანდერძისამებრ, ამ დროს სახლიდან გავიდნენ.

ფრანგული საიტის ცნობით, ექიმებს მკვლელობის ფაქტის დამალვა სურდათ, თუმცა ერთ-ერთი ექთნის ნათესავმა მომხდარის დეტალები რომ შეიტყო, პროკურატურას შეატყობინა.

ბელგიელმა პოლიტიკოსმა და ექიმმა ჟაკ ბროშიმ ჟურნალისტებთან მიცემულ კომენტარში განაცხადა, რომ მომხდარი „ამცირებს ევთანაზიის კონცეფციას, რომელიც ადამიანს ემარება ტკივილის გარეშე დაასრულოს სიცოცხლე“.

მანამდე მჯკ წერდა, რომ იტალიაში კათოლიკე ეპისკოპოსი ევთანაზიის მხარდასაჭერად გამოვიდა.