უმე-ის იერარქი: ლავრაში ხელისუფლების ძალისმიერი ქმედებები არის ამორალური და უკანონო

უმე-ს საინფორმაციო-საგანმანათლებლო დეპარტამენტის ხელმძღვანელი, ნეჟინისა და პრილუკის მიტროპოლიტი კლიმენტი (ვეჩერა). ფოტო: news.liga.net

კიევ-პეჩერის ლავრიდან უმე-ის გამოსახლების შესახებ სასამართლოს საბოლოო გადაწყვეტილებამდე, ხელისუფლების ნებისმიერი ძალისმიერი ქმედება მონასტრის ტერიტორიაზე არა მხოლოდ ამორალური, არამედ უკანონოა. ამის შესახებ tsn.ua-სთვის მიცემულ კომენტარში უმე-ის საინფორმაციო-საგანმანათლებლო დეპარტამენტის ხელმძღვანელმა, მიტროპოლიტმა კლიმენტმა განაცხადა.

„მე გავამახვილებ ყურადღებას იმაზე, რომ ეს (ბერების ლავრიდან გამოსახლების მცდელობა - რედ.) ყოველგვარ სამართლებრივ საფუძველს არის მოკლებული“, - განაცხადა ეპისკოპოსმა. – გვეუბნებიან, რომ სასამართლომ დააკმაყოფილა კულტურის სამინისტროს სარჩელი, თუმცა საზოგადოება არ არის ინფორმირებული, რომ სასამართლოს გადაწყვეტილების საბოლოო ტექსტი ადვოკატებს არ გადაეცათ, ამიტომ გადაწყვეტილება ძალაში ჯერ არ შესულა. მეორეც, ლავრას ამ გადაწყვეტილების წინააღმდეგ შეაქვს სარჩელი და სანამ ეს საკითხი სამართლებრივ ჭრილში არ გადაწყდება, ყველა ძალდატანებითი ქმედება, განსაკუთრებით ასეთი სისასტიკი, რომელიც ხდება, არა მხოლოდ უკანონო, არამედ ამორალურია. რატომ სჩადიან ჩინოვნიკები ასეთ ქმედებებს და არ ეშინიათ არა მხოლოდ ცოდვის, არამედ სამართლებრივი, სისხლის სამართლის პასუხისმგებლობის - ვფიქრობ, საზოგადოება დროთა განმავლობაში აუცილებლად მიიღებს ამ კითხვაზე რეალურ პასუხს. მაშინ გამოვლინდება მთელი ეს შეთქმულება ეკლესიის წინააღმდეგ“.

მიტროპოლიტის თქმით, ბერებს ყველა კანონიერი საფუძველი აქვთ ლავრაში საცხოვრებლად, ზოგიერთი მათგანი 30 წელზე მეტია იქ ცხოვრობს და მონასტრიდან მათი გაძევება „იმ ადამიანების სინდისზე იქნება, ვინც უკანონობას სჩადის. "

მეუფემ ასევე აღნიშნა, რომ რუსეთის ფედერაციის სრულმასშტაბიანი შემოჭრის დაწყების შემდეგ, ბევრი მიგრანტი ცხოვრობს ლავრას შენობებში და გამოსახლების შემთხვევაში, ისინი, ისევე როგორც მონასტრის ძმები, დარჩებიან საცხოვრებლის გარეშე.

„თუ ჩვენ ვაფასებთ კულტურის სამინისტროს ქმედებებს და, კერძოდ, ნაკრძალის ხელმძღვანელობას სამართლებრივ ჭრილში, მაშინ ისინი უკრაინის კონსტიტუციისა და კანონმდებლობის მიღმა რჩებიან. თუ ამ ქმედებებს მორწმუნეებთან, ბერებთან მიმართებაში ზნეობის კონტექსტში შევაფასებთ, მაშინ მათი ქმედებები, ზნეობის ცნებას სცილდება. თუ ჩვენ, როგორც მორწმუნეები, გავაანალიზებთ ოფიციალური პირების ყველა განზრახვას და მოქმედებას კიევ-პეჩერის ლავრასთან დაკავშირებით და შევადარებთ მათ ბიბლიის ცნებებს, მაშინ ბევრისთვის აშკარაა, რომ ამაში არის რაღაც დემონური. ამიტომ, რა თქმა უნდა, მთელ ჩვენს იმედს ღმერთზე ვამყარებთ“, - განაცხადა ეპისკოპოსმა.

მეუფემ ხაზგასმით აღნიშნა, რომ „მორწმუნეებისთვის, ბერებისთვის, სასულიერო პირებისთვის, რომლებმაც აღადგინეს ლავრა, რომლებიც ახლა იქ ცხოვრობენ, რომლებიც აღავლენენ ლოცვებს, მათ შორის მათთვის, ვისაც სურს ზიანი მიაყენოს მათ - ამ ხალხის უკან ღვთის სიმართლე დგას და ყველა სპეკულაცია, ყალბი წინადადებები, ცილისწამება - ეს ყველაფერი იმ ადამიანების სინდისზე იქნება, ვინც დღეს პოლიტიკური ვითარების გამო სჩადის ამ სისასტიკეს’’.

როგორც მჟკ იტყობინება, 15 აგვისტოს, დილით, კიევ-პეჩერის ლავრის ნაკრძალის წარმომადგენლებმა უროს, ლომის და რკინის საჭრელის გამოყენებით გახსნეს მონასტრის 57-ე კორპუსის კარები, სადაც მომლოცველები და რამდენიმე ბერი ცხოვრობს. გარდა ამისა, ნაკრძალის გენერალური დირექტორის მოვალეობის შემსრულებელმა მაქსიმ ოსტაპენკომ უთხრა 58-ე კორპუსში მყოფ ბერებსა და მორწმუნეებს, რომ იქ „მცველები“ ​​იქნებოდნენ, ვინაიდან ლავრის ყველა შენობა „სახელმწიფო საკუთრებაა“.